«Guztiaren abiapuntua mugimendua da, denok dugun berezko joera, eta dantza komunikatzeko erabiltzen den mugimendu fina da. Teknika akasgabe bat garrantzitsua eta txundigarria izan arren, dantzariak mugimendu horren barruan adierazten duena da muina.       

Dantzariak garen aldetik, etengabe mugitzen gara, une ahaztezin horiek sortu nahian. Dantza-mota edozein dela ere, dantzari guztiak ahalegintzen dira hori lortzen. Beraz, bat-batean jarduera hori ukatu zaigunean, antzokiak itxita eta jaialdiak bertan behera, gure munduak gelditu egin dira. Ez dago kontaktu fisikorik. Ez dago ikuskizunik. Ikuslerik gabe. Historia hurbilean, dantza-komunitateari ez zaio sekula erronka kolektiborik egin motibazioari eusteko, bere izaeraren funtsa aurkitzeko.               

Haatik, oraingo hau da, hain zuzen ere, baliozko zerbait kendu diguten unea, oraintxe jabetzen gara egiten duguna zein funtsezkoa den, eta dantzak zer esanahi duen gizartearentzat, oro har. Maiz goraipatzen da dantzarien trebetasun fisikoa, eta, izatez, guretzat euskarri sendoagoa da buruaren indarra. Uste dut zolitasun fisikoaren eta psikologikoaren konbinazio berezi horrek lagundu egingo digula hobetzen, geure burua berrasmatzen, dantzatzen eta besteak inspiratzen jarraitzeko».